“Die rede waarom ons bid, is dat ons eenvoudig nie anders kán nie”. Dié aanhaling van William James is die eerste teks waarmee jy kennis maak as jy Philip Yancey se nuwe boek Gebed – Maak dit enige verskil? van Lux Verbi oopmaak. In dié boek ondersoek een van ons tyd se geloofwaardigste Christelike denkers, en ook die skrywer van die gewilde What’s so amazing about grace, die vrae omtrent gebed waaroor baie van ons wonder, maar wat die meeste nie waag om te verwoord nie. Soos wat is die doel van gebed as God rééds als weet?

Byna oral in die wêreld word gebed deesdae met skeptisisme besmet. Ons asem ’n atmosfeer van twyfel in: Hoekom laat God die wêreldgeskiedenis voortsteier sonder om in te gryp? Watter nut sal gebed hê teen ’n ongeneeslike siekte of gestremdheid; of teen die bedreiging van ’n kernaanval, terrorisme, misdaad, oorstromings en globale klimaatsverandering?